Last Modified: August 06 2012 03:53:47.

ശ്രീഗുരുവായുപുരേശ സുപ്രഭാതം

ശ്രീവാസുദേവ നളിനേക്ഷണ നന്ദസൂനോ
ശ്രീവാസവത്സ പരിതാപതമിസ്രഭാനോ
ശ്രീവാസവാനുജ തനൂദ്ഗത ദിവ്യഭാനോ
ശ്രീവാതമന്ദിരപതേ തവ സുപ്രഭാതം. 1.

ഭക്താവനൈകപര നൈകവിധൈഹികാശാ-
രിക്താന്തരംഗകൃതവാസ കൃപാപയോധേ
മുക്താവലീവിലസനാലയ വിശ്വഹേതോ
ശ്രീവാതമന്ദിരപതേ തവ സുപ്രഭാതം. 2.

വിശ്വാവബോധ വിഷയീകൃത ഗാഢഭക്തി-
വിശ്വാസഗമ്യദിവിഷന്നുത ദിവ്യമൂര്‍ത്തേ
വിശ്വാധിദേവ വിവിധാര്‍ത്തി വിനാശകാരിന്‍
ശ്രീവാതമന്ദിരപതേ തവ സുപ്രഭാതം. 3.

ജ്ഞാനാത്മനാത്മ മഹനീയ മഹോവിശേഷൈര്‍
നാനാവിധൈര്‍വിലസിതൈശ്ചനൃണാംനികാമം
മാനാതിഗപ്രമദദായക കൈടഭാരേ
ശ്രിവാതമന്ദിരപതേ തവ സുപ്രഭാതം. 4.

ഏകാന്തഭക്തിവിനയാദിഗുണാന്വിതാനാം
ശോകാന്തകാര നിഖിലേശ്വര വിശ്വമൂര്‍ത്തേ
പാകാന്തകാദിസുരസംസ്തുതദിവ്യകീര്‍ത്തേ
ശ്രീവാതമന്ദിരപതേ തവ സുപ്രഭാതം. 5.

ആകാരകാന്തിജിതവാരിദ ദാരിതാരേ
ശ്രീകാന്തകാന്ത മുഖപങ്കജ ചക്രപാണേ
ആകാംക്ഷിതപ്രദ സദാ ശരണാഗതാനാം
ശ്രീവാതമന്ദിരപതേ തവസുപ്രഭാതം. 6.

ശ്രീരാജമാനസുമനോമകുടാഗ്രരത്ന-
നീരാജിതാംഘ്രിയുഗ ഭക്തജനൈക ബന്ധോ
നാരായണാച്ച്യുത ഹരേ ഭഗവന്‍ മുരാരേ
ശ്രീവാതമന്ദിരപതേ തവ സുപ്രഭാതം. 7.

ഭൂലോകവാസി ജന പുണ്യഫലേനൃണാം
ആലോകനായ ഗുരുവായുപുരേഭിരാമേ
ത്രൈലോക്യനായകവിഭോ ത്വമിഹാവിരാസിഃ
ശ്രീവാതമന്ദിരപതേ തവ സുപ്രഭാതം. 8.

വാരാശിരാശിരശനാധവ ശാര്‍ങ്ഗപാണേ
ഘോരാശരാന്വയ വിനാശന ഭവ്യമൂര്‍ത്തേ
സൂരായുതോപമ സമസ്തചരാചരാത്മന്‍
ശ്രീവാതമന്ദിരപതേ തവ സുപ്രഭാതം. 9.

സംസാരസാഗരതരംഗപരംപരായാ-
മംസാന്തമജ്ജനവശാദതിതാപഭാജാം
പുംസാം സ്വകീയകരുണാതരണിപ്രദായിന്‍
ശ്രീവാതമന്ദിരപതേ തവ സുപ്രഭാതം. 10.

വാമാജനാസ്സുമഗണാന്‍ സരസം വഹന്തഃ
സീമാതിരിക്തവിനയേന സമര്‍ച്ചനാര്‍ത്ഥം
കാമാനുകൂലമഭിയാന്തി ഭവത്സകാശം
ശ്രീവാതമന്ദിരപതേ തവ സുപ്രഭാതം. 11.

സ്നാത്വാ പ്രഭാതസമയേ നിയമാന്‍ വിധായ
ധ്യാത്വാ പ്രഭാവലയിതം ഭവദീയരൂപം
നത്വാ ഭവന്തമനിശം വിലസന്തി സന്തഃ
ശ്രീവാതമന്ദിരപതേ തവ സുപ്രഭാതം. 12.

ആനന്ദരൂപ പുരുഷോത്തമ പുണ്ണ്യമൂര്‍ത്തേ
ശ്രിനന്ദനന്ദന മുകുന്ദ മുദംബുരാശേ
ആനമ്രഭക്തജനപൂജിത മുക്തിദിത്സോ
ശ്രീവാതമന്ദിരപതേ തവ സുപ്രഭാതം. 13.

വൃന്ദാവനാവനി വിഹാര പരാത്മഭക്ത-
വൃന്ദാവനോത്സുക നിജാശ്രിതകാമദായിന്‍
വന്ദാരുവൃന്ദഹരിചന്ദന ശേഷശായിന്‍
ശ്രീവാതമന്ദിരപതേ തവ സുപ്രഭാതം. 14.

ആശാവകാശശതതഭൂതിവിശേഷ നാനാ-
ക്ലേശാവശാവനവിധാന നിബദ്ധബുദ്ധേ
ആശാവിഹീനമുനിമാനസവാസ വിഷ്ണോ
ശ്രീവാതമന്ദിരപതേ തവ സുപ്രഭാതം. 15.

ത്രൈലോക്യനാഥ നിജഭക്തജനോത്കരാണാം
സാലോക്യദാനപര ദേവഗണൈകബന്ധോ
ആലോകനീയസുഷമാവൃതചാരുമൂര്‍ത്തേ
ശ്രീവാതമന്ദിരപതേ തവ സുപ്രഭാതം. 16.

പ്രദ്യോതനസ്യകിരണൈരരുണൈര്‍നികാമം
വിദ്യോതമാനമഖിലം വിതതാബ്ദജാലം
സദ്യോവിഭാതി ദിവി ശോണവിതാനതുല്യം
ശ്രീവാതമന്ദിരപതേ തവ സുപ്രഭാതം. 17.

ഗോവിന്ദകൃഷ്ണ മധുസൂദന വാസുദേവേ-
ത്യാവിര്‍മുദാ പരമഭക്ത ജനാജപന്തഃ
ഹേ വിശ്വരൂപ തവവിഗ്രഹമാനമന്തി
ശ്രീവാതമന്ദിരപതേ തവ സുപ്രഭാതം. 18.

ശ്രീവത്സവത്സ നതവത്സല സത്വസിന്ധോ
ശ്രീവല്ലഭാംബുരുഹലോചന ദീനബന്ധോ
കൈവല്യദായക ദയാമയ സത്യമൂര്‍ത്തേ
ശ്രീവാതമന്ദിരപതേ തവസുപ്രഭാതം. 19.

[ഫലശ്രുതി ]

ഏവം മരുത്പുരപതേ ശുഭസുപ്രഭാതം
ഭാവപ്രകൃഷ്ട മനസാ പഠതാം ജനാനാം
കൈവല്യമപ്രതിഹതേപ്സിതസിദ്ധിരൃദ്ധി-
രേവംവിധാ വിവിധഭവ്യഗണാ ഭവേയുഃ.

[ശരണാഗതിസ്തുതി ]

കരുണാവരുണാലയ സര്‍വപതേ
തരുണാരുണസന്നിഭദീപ്രതനോ
ശരണാഗതവത്സല തേ ചരണം
ഗുരുവായുപുരേശ്വര മേ ശരണം. 1.

വിനതാസുതവാഹന വിശ്വഗതേ
വിനതാശ്രിതപാലനബദ്ധമതേ
ജന താപ വിനാശന തേ ചരണം
ഗുരുവായുപുരേശ്വര മേ ശരണം. 2.

കമനീയഗുണാകര ഭക്തജനൈര്‍
കമനീയമനോഹര രൂപ വിഭോ
സുമനീഷിവിഭാവിത തേ ചരണം
ഗുരുവായുപുരേശ്വര മേ ശരണം. 3.

കമലാകരലാളിത യോഗിമനഃ
കമലാകരലാസകഹംസ ഹരേ
ശമലാപഹ കേശവ തേ ചരണം
ഗുരുവായുപുരേശ്വര മേ ശരണം. 4.

പരിപാവനമാനസ വാസ സതാം
പരിപാലനതല്പര സത്ത്വനിഥേ
പരിണാമവിവര്‍ജ്ജിത തേ ചരണം
ഗുരുവായുപുരേശ്വര മേ ശരണം. 5.

പ്രണതാര്‍ത്തി വിനാശക പുണ്യവതാം
ഗുണതാന സമുത്സുക മുക്തഗതേ
ക്ഷണദാചരസൂദന തേ ചരണം
ഗുരുവായുപുരേശ്വര മേ ശരണം. 6.

പതിതോദ്ധരണോത്സുക ഹൈമവതി
പതിഭാവിത ഭാവുകജാലനിധേ
പ്രതിഭാവദവേക്ഷിത തേ ചരണം
ഗുരുവായുപുരേശ്വര മേ ശരണം. 7.

ഭവസാഗരതാരക സാരനിധേ
ഭവപത്മഭവാദിസുപര്‍വപതേ
ഭുവനൈകനിയാമക തേ ചരണം
ഗുരുവായുപുരേശ്വര മേ ശരണം. 8.

അവനാവവനായ നിജാംഘ്രിജുഷാ-
മവതീര്‍ണ്ണ വിതീര്‍ണ്ണവിശിഷ്ടഗതേ
ശിവതാതിവിധായക തേ ചരണം
ഗുരുവായുപുരേശ്വര മേ ശരണം. 9.

അവധാനനിധാനമഹര്‍ഷിഗണൈ-
രവധാരിത മാരിതപാപതതേ
അവശാവനലാലസ തേ ചരണം
ഗുരുവായുപുരേശ്വര മേ ശരണം. 10.

അപരാധശതൈരതിദൂനമിമം
കൃപയാ പരയാ പരിപാലയമാം
അപവര്‍ഗ്ഗസൃതി പ്രദതേ ചരണം
ഗുരുവായുപ്രേശ്വര മേശരണം. 11.

അഭിരാമഗുണാകര പുണ്യജനൈ-
രഭിരാദ്ധ നിരാകൃതദോഷതതേ
അഭിഗമ്യസഥാമയി തേ ചരണം
ഗുരുവായുപുരേശ്വര മേ ശരണം. 12.

[ഫലശ്രുതി ]

ശരണാഗതി വിഖ്യാത സ്തോത്രരത്നമിദം ശുഭം
ഭക്ത്യാ പഠന്‍ ജനോ നിത്യം ലഭതേഭീഷ്ടസമ്പദഃ

[മംഗളസ്തുതി ]

ശ്രീകൃഷ്ണായ മുകുന്ദായ ശ്രീരാജദ്ദിവ്യവര്‍ഷ്മണെ
ഗുരുവായുപുരേശായ ജഗദീശായ മംഗളം. 1.

കരുണാര്‍ദ്രമനസ്കായ തരുണാരുണ രോചിഷേ
ഗുരുവായുപുരേശായ ഋഷീകേശായ മംഗളം. 2.

വിശ്വപാലനദീക്ഷായ വിശ്വസന്താപഹാരിണേ
ഗുരുവായുപുരേശായ വാസുദേവായ മംഗളം. 3.

ഭവാബ്ധിതാരകായാബ്ജഭവാഭീഷ്ടുതകര്‍മ്മണെ
ഗുരുവായുപുരേശായ രാധാകാന്തായ മംഗളം. 4.

പയോധികന്യാപതയേ പയോദോപമ മൂര്‍ത്തയേ
ഗുരുവായുപുരേശായ നന്ദപുത്രായ മംഗളം. 5.

താപാപനോദലോലായ പാപാരണ്യ ഭവാഗ്നയേ
ഗുരുവായുപുരേശായ ദേവദേവായ മംഗളം. 6.

ദിവ്യജോതിഷ്മതേ നിത്യഭവ്യദായ ശരീരിണാം
ഗുരുവായുപുരേശായ ചിദാകാരായ മംഗളം. 7.

പ്രപന്നജനസന്ദോഹമന്ദാരായ പരാത്മനേ
ഗുരുവായുപുരേശായ പുണ്യരൂപായ മംഗളം. 8.

സച്ചിദാനന്ദരൂപായ സര്‍വഭൂതാന്തരാത്മനേ
ഗുരുവായുപുരേശായ പത്മനാഭായ മംഗളം. 9.

ഭക്തലോകാവനോത്ക്കായ ഭുക്തിമുക്തി പ്രദായിനേ
ഗുരുവായുപുരേശായ വിഷ്വക്‍സേനായ മംഗളം. 10

വിശ്വഗേയാപദാനായ ശാശ്വതാനന്ദ ദായിനേ
ഗുരുവായുപുരേശായ സര്‍വശക്തായ മംഗളം. 11.

ശിഷ്ടപാലന ലോലായ ദുഷ്ടസംഹാരകാരിണേ
ഗുരുവായുപുരേശായ സാരസാക്ഷായ മംഗളം. 12.

[ഫലശ്രുതി ]

യസ്തു നിത്യമിദം ഭവ്യം
വാതഗേഹേശ മംഗളം
പഠേത് സ തരിതും ശക്തോ
ഭവേത് സംസാരസാഗരം.