Last Modified: February 29 2012 14:45:19.
ഒഴുകുന്ന കണ്ണീര്‍ തുടച്ചു കൊണ്ടന്നു നാം
വഴി പിരിഞ്ഞെങ്കിലും ഓമലാളെ
പുഴയൊഴുകും വഴി മാറിടും പുത്തനാം
പുളിനത്തില്‍ നിന്നെ ഞാന്‍ തേടിയെത്തും

അതുവരെ എന്‍റെ ഈ വ്യര്‍ത്ഥ സ്വപ്നങ്ങളും
മധുര പ്രതീക്ഷതന്‍ മുരളികയും
കതിര്‍ മണ്ഡപത്തിലേക്കെണ്ണ നിറച്ചു ഞാന്‍
കരുതിയ കത്താത്ത മണി വിളക്കും
നിധികളായ് സൂക്ഷിച്ചെന്‍ വിജനമാം സത്രത്തില്‍

ചിരസഖി നിന്നെ ഞാന്‍ കാത്തിരിക്കും
(ഒഴുകുന്ന )

സമയ മന്ദാകിനി തീരത്ത് ഞാന്‍ നട്ട
പ്രണയമാം ഗന്ധം ചിരിച്ചു വീണ്ടും
തളിരും മലരും അണിയും കാലം
സവിധത്തില്‍ നിന്നെ ഞാന്‍ തേടിയെത്തും
ഒരു നീല താരത്തിന്‍ നെയ്ത്തിരി വെട്ടത്തില്‍

ഒരു രാവില്‍ നാം തമ്മില്‍ കണ്ടു മുട്ടും
(ഒഴുകുന്ന)