Last Modified: November 30 2013 06:27:51.

വരമഞ്ഞളാടിയ രാവിന്‍റെ മാറില്‍ ഒരു മഞ്ഞുതുള്ളിയുറങ്ങി
നിമിനേരമെന്തിനോ തേങ്ങി നിലാവിന്‍ വിരഹമെന്നാലും മയങ്ങി
പുലരിതന്‍ ചുംബനക്കുങ്കുമമല്ലേ ഋതുനന്ദിനിയാക്കി
അവളേ പനിനീര്‍ മലരാക്കി
വരമഞ്ഞളാടിയ രാവിന്‍റെ മാറില്‍ ഒരു മഞ്ഞുതുള്ളിയുറങ്ങി

കിളിവന്നു കൊഞ്ചിയ ജാലകവാതില്‍ കളിയായ് ചാരിയതാരേ
മുടിയിഴ കോതിയ കാറ്റിന്മൊഴിയില്‍ മധുവായ് മാറിയതാരേ
അവളുടെ മിഴിയില്‍ കരിമഷിയാലേ കനവുകളെഴുതിയതാരേ
നിനവുകളെഴുതിയതാരേ അവളേ തരളിതയാക്കിയതാരേ
വരമഞ്ഞളാടിയ രാവിന്‍റെ മാറില്‍ ഒരു മഞ്ഞുതുള്ളിയുറങ്ങി
നിമിനേരമെന്തിനോ തേങ്ങി നിലാവിന്‍ വിരഹമെന്നാലും മയങ്ങി

മിഴിപെയ്തുതോര്‍ന്നൊരു സായന്തനത്തില്‍ മഴയായി ചാറിയതാരേ
ദലമര്‍മ്മരം നേര്‍ത്ത ചില്ലകള്‍ക്കുള്ളില്‍ കുയിലായ് മാറിയതാരേ
അവളുടെ കവിളില്‍ തുടുവിരലാലേ കവിതകളെഴുതിയതാരേ
മുകുളിതയാക്കിയതാരേ അവളേ പ്രണയിനിയാക്കിയതാരേ
വരമഞ്ഞളാടിയ..................