Last Modified: February 29 2012 14:57:07.


ഇഴനൊന്തു തകർന്നൊരു മണി വീണ ഞാൻ
ഇടനെഞ്ചിൽ അപശ്രുതി മാത്രം
ഇതൾ വാടിക്കരിയുന്ന കദളീമുകുളം
ഹൃദയത്തിൽ എരിവേനൽ മാത്രം - എൻ
ഹൃദയത്തിൽ എരിവേനൽ മാത്രം

നെടുവീർപ്പിൻ താളമായ്‌ ഇതു വഴി ഒഴുകും
ചുടലപ്പറമ്പിലെ കാറ്റേ
പുണരൂ വന്നെന്നെ പുണരൂ
പുണരൂ വന്നെന്നെ പുണരൂ
സ്വരരാഗ മധുരിമ ചൂടിയ കാറ്റേ
ഗന്ധർവ്വ ഗാനത്തിൻ അന്തിമ പാദമേ
ചിന്തകളിൽ വീണുറയൂ
(ഇഴ നൊന്തു)

ചിരകാല മോഹങ്ങൾ തോരണം ചാർത്തുമെൻ
ചിത്ര മനോരഥ പഥമേ
മറക്കൂ സർവ്വവും മറക്കൂ
മറക്കൂ സർവ്വവും മറക്കൂ
നിറദീപമണഞ്ഞു തിമിരമായ്‌ മുന്നിൽ
പിടയരുതേ തേങ്ങി വിതുമ്പരുതേ
എൻ കരളാം ചിറകറ്റ കിളിയേ
(ഇഴ നൊന്തു)